LA UNION – Naalarma dagiti kameng iti Commission on Election (Comelec) Provincial Office gapu ti mapagatapan a lugan a nakaparada idiay sango ti opisina idiay syudad ti San Fernando, La Union itattay bigat.
Dagus nga impaikkat ni La Union Election Supervisor Joel Gines ti nasao a lugan a maysa a Tamaraw Fx gapu iti panagdanag nga addaan daytoy ti kontrabando wenno bomba.
Nakabalandra ngamin daytoy idiay ruangan ti Comelec.
Kalpasan a maiyadayo ti nasao a lugan idiay opisina ket inalikad daytoy dagiti pulis kasaruno iti pannakadiskobre dagiti trapulin ken lobo nga adda iti uneg.
Saan pay a nabigbig iti makinkukua iti lugan ken burbutiya pay laeng iti pulisya no kasano a nakaserrek daytoy iti arubayan ti Comelec.
Iti laksid ti nasao nga insidente ket tuloy iti operasyon ti Comelec tapno awaten iti certificate of candidacy dagiti kandidato.
