Inwaragawag ti Commission on Elections (Comelec) idi Mierkoles nga inasurada iti reklamo mainaig iti maipagarup a ₱75-milion campaign donation kenni Senador Rodante Marcoleta gapu ta saanen a maibilang a criminal offense iti agdama a linteg iti saan a panangideklara ti maysa a kandidato ti campaign contributions.
Segun kenni Comelec Chair George Erwin Garcia, saan nga inkeddeng ti komision no pudno a naited ti mapapati a donasion. Kenunana a naibasura iti reklamo gapu iti 1991 amendments iti election law nangipababa iti nasao a panaglabsing kas administratibo a kaso a madusa laeng iti multa a ₱2,000 agingga iti ₱20,000.
Inlawlawag ni Garcia nga agtalinaed nga addaan ti criminal liability dagiti donors a saan a mangipadamag ti kontribusionda iti kampania ken pinaregtana ti Kongreso a repasuen iti linteg tapno mailinteg ti saan a patas a pannakatrato dagiti kandidato ken donors.
Impaganetgetna pay a naisina iti addang ti Comelec kadagiti kaso a sangsanguen ni Marcoleta iti Office of the Ombudsman ken Sandiganbayan mainaig iti kaso a plunder.
Innayon ni Garcia a binilin ti Comelec dagiti maipagarup a nagdonar a mangisubmitir iti palawag, ken mabalin latta a mangipila iti kaso kontra kadakuada no mapaneknekan a sinalungasingda ti campaign contribution reporting requirements.###
