LA UNION – Nainget a pinaglibakan iti Commission on Election (Comelec) dagiti agwarwaras a biddut a damag iti social media nga insardeng ti ahensya ti panag-release iti voter’s identification card.
Iti pannakiuman ti Bombo Radyo kenni Atty. Noli Pipo, regional director ti Comelec Regional Office-1, kinunana nga agtultuloy iti panangaramid iti central office ti ahensya kadagiti voter’s ID a maited kadagiti probinsya.
Nagpanawagan ni Pipo kadagiti nagparehistro a botante a saan a patien dagiti biddut a damag nga agwarwaras iti social media maipapan iti saan a mangited ti ID card.
Inlawlawag ti opisyal, a saanda a kontrol iti field offices ti sitwasyon wenno iti panangaramid kadagiti voter’s ID gapu ta daytoy ket adda ti hurisdiksyon ti central office.
Nagkiddaw met iti pannakaawat ti Comelec kadagiti botante ken pinalagipanda dagitoy nga an-anusan iti agsaludsod iti lokal nga opisinada no simmangpeten ti ID card.
