LA UNION – Kagiddan iti panagrugi ti kampanya ita nga aldaw dagiti agpaibotos iti Barangay ken SK elections, impaganetget met ti Commission on Elections (Comelec)-La Union dagiti allagaden a rumbeng a suruten tapno awan ti aberya ken agbalin a naannayas iti panagkampanya iti uneg ti siyam nga aldaw.
Iti eksklusibo nga interview ti Bombo Radyo La Union kenni Provincial Election Supervisor Atty. Joel Gines, imbinsa-binsa na dagiti do’s and don’ts a rumbeng nga aramiden dagiti kandidato iti barangay ken sangguniang kabataan.
Malaksid iti umno a panagipaskil kadagiti campaign materials iti designated common poster areas, impaganetget na pay iti pananglisi ti ‘personal attack’ wenno pammadakes kadagiti pada a kandidato, tapno maliklikan iti riribok.
Maiparbeng laeng kunana a ti bukod a propaganda iti ikampanya dagiti kandidato kadagiti botante.
Nagpalagip pay iti amin, nangruna kadagiti kandidato ken supporters a saan nga agimet iti ruar ti balay iti anyaman a klase ti deadly weapons, tapno saan a mamantsaan iti dara iti panagkampanya ingkaso nga agsisinnabat dagiti agkaribal a kandidato.
Kagiddan daytoy, impanakkel ni Atty. Gines a base iti latest report ti La Union Police, awan pay iti nailista nga untoward incident ditoy probinsiya nga election related, sipud nangrugi iti election period agingga iti agdama.
