LA UNION – Awan ti uray maysa a baro a botante ti nagturong iti Comelec offices ditoy probinsiya a nagparehistro para iti nakatuding a Barangay ken SK elections inton May 11, 2020.
Idi kalman, Agosto a-uno, iti panangrugi manen ti agtultuloy a voter registration kadagiti baro a botante nga isay-sayangkat ti Commission on Election (Comelec).
Ngem base iti impormasyon ti Bombo Radyo La Union kadagiti natawagan a Comelec Officers, awan pay iti nailista da a baro a botante.
Posible a makaapekto iti rehistrasyon ti komisyon iti nagbalin a waragawag itay kallabes ni Pangulong Rodrigo Duterte iti maikapat a SONA, nga agpan-panawagan iti Kongreso a mangipasa ti linteg a mangitantan ti Barangay Election inton October 2022.
Immunan nga imbaga ni Atty. Noli Pipo, Comelec Regional Director, nga itultuloy da latta iti panagparehistro ken target da a mangisayangkat ti outside registration, partikular kadagiti pagadalan ken barangay, tapno allokoyen nga agparehistro dagiti baro a botante.
Iti registration period ket agleppas inton Sept. 30 ti agdama a tawen.
