Impakdaar ti Commission on Population and Development (CPD) iti panagngato ti bilang dagiti agsiksikog nga young adolescent nga ub-ubing pay ngem 15-anyos, laksid ti panagbaba iti pakabuklan a bilang ti teenage pregnancies ditoy Pilipinas.
Maibasar iti datos ti Philippine Statistics Authority (PSA), manipud iti 138,697 live births dagiti babbai nga agtawen ti 10-19 idi 2024, 3,612 ditoy ket kadagiti balasitang nga agtawen ti nababbaba ngem 15 manipud iti bilang a 3,343 idi 2023.
Segun kenni CPD Undersecretary Lisa Bersales a bayat nga agtultuloy a bumasbassit iti panagsikog iti nagbaetan ti edad a 15 agingga 19 gapu iti agdama a programa ti gobierno, ngumatngato met iti kaso kadagiti ub-ubing a grupo.
Karaman kadagiti rason ket ti kinakurapay, limitado nga oportunidad iti edukasion, ken nasapa a pannakaisarang iti seksual a linaun ti social media.
Dinakamat pay ni Bersales iti panagkasapulan ti localized interventions, pakairamanan iti pannakitinnulong kadagiti lokal a gobierno ken barangay, ken panang-target kadagiti agtutubo iti wagas a maawatanda.
Iparparegtana nga iti mensahe ket saan a naisentro iti sex education no di ket iti panangisuro kadagiti ubbing maipapan kadagiti arapaap ken panggepda iti biag.
Innayonna a napateg ti akem dagiti pagadalan ken mannursuro iti pananglapped iti panagsikog dagiti agtutubo, ken rumbeng nga adda ti synchronized efforts kadagiti amin nga LGUs tapno masigurado nga agpapada dagiti programa iti intero a pagilian.###
