Nalatak ita iti social media ti kanta a “Hawak mo ang beat” gapo iti naragsak a rhythm ken feel-good vibe, a nangigubuay met iti adu a dance videos na online.
Nupay kasta ket nakagun-od met daitoy ti pammabalaw kalpasan iti panagsaknap a naaramid ti kanta babaen ti Artificial Intelligence wenno AI.
Segun kenni DJ Mogo wenno Sylvain Hernandez, composer ti kanta kadwa ti Filipina nga asawa na, inspirasyon da iti tradisyonal a Visayan cha-cha nga addaan ti “light, bouncy, ken joyful vibe.”
Impaganetget na a saan a nangaramat ti AI ti “Hawak mo ang Beat” kasta met a “100 percent” a daitoy ket kabukbukodan na nga aramid.
Kinuna met ni Pablo iti grupo nga SB19 a nupay napateg a tool iti AI, rumbeng laeng a maaramat daitoy a responsable ken addaan ti pammalubos kadagiti artist.
Inyunay-unay na a ti panangtulad ti aramid ti sabali a saan a nagpakpakada wenno awanan iti consent ket saan nga etikal ken ilegal, kasaruno iti panawagan na para ti nainget a regulasyon.
Nagballaag met ti Filipino Society of Composers, Authors and Publishers Incorporated kadagiti mangus-usar ti generative AI a siguraduen a lisensyado dagiti materyales da.
