LA UNION – Natay iti conductor ti maysa a partas bus kalpasan a naidungpar dagitoy iti maysa a truck, iti kawatiwatan ti national highway, sakop ti Barangay San Benito Norte, Aringay, La Union.
Napasamak ti aksidente pasado alas 12:00 itay tengngat parbangon.
Iti biktima ket nabigbig iti nagan a Samuel Ramos, 48-anyos, residente ti Bakakeng, Baguio City.
Nabigbig met dagiti driver nga isuda; Jerry Collantes, 35-anyos, residente ti San Juan, Ilocos Sur, nagmaneho iti Partas bus, addaan ti body number 82598 ken Dominador Dela Cruz, 58-anyos, residente ti Cainta Rizal.
Maibasar iti inisyal a report, iti partas bus ket agturong iti amianan a direksiyon bayat a ti truck ket agpa-abagatan a direksiyon, idi maipagarop nga immagaw ti linya iti truck, a puon metten ti panagdinnungpar dagiti dua a behikulo.
Iti kapigsa ti impact ti aksidente, natay iti conductor ken maipagarop a rimuar ti bagisna, naipit met dagiti dua driver ken nadundunor dagiti sumagmamano a pasaheros ti partas bus.
Dagus a naiturong dagiti nadundunor iti kaasetgan nga ospital para iti pannakataming dagitoy.
Kabayatanna, ni Collantes ket naiyakar iti Ilocos Training and Regional Medical Center (ITRMC) ditoy siyudad ti San Fernando para iti naan-anay a pannakataming daytoy.
