Kiniddaw ti Confederation of Lawyers of Asia and the Pacific (COLAP) iti gobierno ti Pilipinas a protektaran ti karbengan dagiti abogado a karaman ti panagdengngeg ni sigud a Presidente Rodrigo Roa Duterte.
Ti apela ti grupo ket kalpasan dagiti nagsasaruno a panagraut kontra kenni Attorney Kristina Conti, ti abogado nga immasistir kadagiti biktima ti drug war.
Segun iti grupo, ni Attorney Conti ket makapadpadas kadagiti serye ti red-tagging ken panangdadael manipud kadagiti supporters ni sigud a Presidente Duterte.
Impaganetget da a naaramidan ni Atty. Conti a tulongan dagiti biktima ti drug war manipud pay tawen 2016 ken kas assistant to councel sadiay International Criminal Court ket dakkel ti akem na iti panagdengngeg ti kaso ti sigud a Chief Executive.
Nagduduma iti mapadpadasan ni Atty. Conti a panagharass, panangibabain, ken panagpangta gapo ti panagiggem ti human rights case kasta met dagiti kaso nga addaan ti nangato a public interest.
Sumagmamano met kadagiti indetalye da a wagas ti panagraut ket ti malisyoso ken peke a post iti social media, direct message, phone call, ken dadduma pay a klase ti panagpangta.
Inyapela ita ti grupo a COLAP iti gobierno ti Pilipinas a maimbestigaran ken matutokan ti mapadpadasan ni Atty Conti, kasta met dagiti dadduma pay nga abogado ditoy pagilian.
Impasigurado met ti grupo a masalakniban ti karbengan dagiti abogado kas maiyannurot metten ti United Nations Basic Principles on the Role of Lawyers.
Impaganetget da pay nga addaan ti obligasyon iti Pilipinas a protektaran dagiti umili kontra ti pangta ti biag, kinawaywayas, seguridad, kasta metten ti proteksyon dagiti abogado a mangig-iggem kadagiti nagduduma a kaso.
