Inlawlawag ni Ilocos Norte 1st District Representative ken Presidential Son Sandro Marcos no apay nga isu ti immuna a nagpirma iti impeachment ni Bise Presidente Sara Duterte.
Segun kenkuana, ti kangrunaan a rason no apay nga indauluanna ti panagpirma iti dagup a 215 a kongresista a nagbutos iti impeachment ket gapu iti immun-una nga anunsio ti bise presidente nga isu ket mangkali iti bangkay ni lolona, ni sigud a presidente Ferdinand Marcos Senior ti tanem dagiti bannuar ket ibelleng na kano idiay West Philippine Sea.
Mainayon pay ket kinunana a maysa kadagiti banag a nangiduron kenkuana a mangpirma para iti impeachment ket gapu iti pangta ni Bise Presidente Sara a mangpapatay kadagiti nagannakna, ni Presidente Ferdinand Bongbong Marcos Junior, First Lady Liza Araneta Marcos, ken Speaker Martin Romualdez.
Dinakamatna a dina pinaregta dagiti padana a mamanday-linteg a mangpirma tapno mai-impeach ti bise presidente ken awan kinapudno na a maikkan dagiti kongresista iti kuarta a nagpirma iti impeachment maibusor iti maikadua a kangatuan nga opisial ti pagilian.
