Madama pay laeng ti pannakasapol ti bagi ti maysa a construction worker a nagdigos iti baybay idiay Barangay Darigayos, ili ti Luna, La Union idi malem kalman.
Nabigbig ti biktima a ni Mark Anthony Carig, 25, baro, residente ti Barangay Poblacion, Bacnotan, La Union.
Maibasar iti report a nakalap ti Bombo Radyo La Union News Team iti Luna Police Station, alas 12:15 idi aldaw kalman ti biktima ken ti kasinsin na a ni Roi Oredina, 30 anyos, baro pada na a construction worker ken residente met laeng ti Barangay Poblacion, Bacnotan ket immuna a naginom ti arak iti cottage a kukua ni Nicole Cortez.
Apaman a nakaibos dagitoy ti dua a bote ti arak ket dagusda a timmapog iti baybay.
Bayat iti panagdigdigos dagitoy ket kellaat nga inyanod ti napigsa nga dalluyon ti biktima agingga a saanen a nakita pay ti kasinsin na a nangitunda ti panagpaarayat na tattao iti lugar.
Iti agdama, agtintinnulong ti Philippine Coast Guard, volounteers, dagiti mangngalap ken ti Municipal Dissaster Risk Reduction Management Office para iti retrieval operation iti bagi ti nasao a biktima.
