LA UNION – Natay iti maysa a construction worker bayat a magmagna kalpasan a naatake iti puso.
Nabigbig daytoy iti nagan a Jerry Aris, 52, tubo ti Calbayog, Samar.
Iti eksklusibo nga interview ti Bombo Radyo kenni Roberto Mirafuentes, 50, maysa a foreman, tubo ti San Jose Del Monte Bulacan, kinuna na a kadwa na ni Aris a magmagna agturong iti merkado, idi kellaat lattan a natumba daytoy.
Naiturong ti biktima iti kaasetgan nga ospital ngem indeklara ti attending physician a dead-on-arrival.
Nagpanawagan met ni Mirafuentes kadagiti cabagyan ni Aris idiay Calbayog, Samar babaen ti Bombo Radyo Tacloban a lima nga aldaw a lamayan da iti bangkay ket nu awan ti mauray da a cabagyan ket ipaayan da laengen ti disente a pannakaitabon ditoy La Union.
Da Aris ken Mirafuentes ket agpada nga agtrabtrabaho iti maipatpatakder a mall iti Barangay Sevilla, San Fernando City, La Union.
