LA UNION – Dead on arrival iti ospital ti maysa a construction worker kalpasan a naidungpar ti man-manehuen na a motorsiklo iti maysa a kotse, iti kawatiwatan ti national highway idiay Brgy. Urbiztondo, San Juan, La Union agarop alas 8:15 idi rabii.
Nabigbig iti biktima a ni Sherwin Tamsi, residente ti nasao a lugar.
Bayat a ti respondent driver ken nagmaneho ti kotse ket managan Mark Aldrin Dela Cruz, 35-anyos, ken residente ti Brgy. Bulala, Bacnotan, La Union.
Base iti inisyal nga imbestigasyon ti San Juan Police Station, dumaldalyasat ti biktima iti nasao a kalsada agturong iti amianan a direksyon idi makadinungpar na iti kasinnabat daytoy a kotse a maipagarop nga immagaw ti linya.
Naiturong pay ti biktima iti ospital ngem indeklara ti attending physician a natayen daytoy.
Kabayatanna, iti pannakiuman ti Bombo Radyo La Union kenni Police Master Sergeant (PMSgt.) Raymund Laron ti San Juan Police Station, kinumpirma na a saanen nga agidarum iti pamilya ti biktima kalpasan a nakitinnunos ni Dela Cruz nga agbayad ti danyos.
