LA UNION – Dead-on-arrival idiay La Union Medical Center idiay Agoo, La Union iti maysa a construction worker kalpasan a nakoryente idi aksidente a naiggaman na iti live wire.
Napasamak daytoy pasado alas 10:00 ti rabii idi Biyernes, June 28, 2019 iti pagtrab-trabahuan da a construction site idiay Barangay Pugo, Bauang, La Union.
Iti biktima ket nabigbig iti nagan nga Emil Gagasa, 29, baro, residente iti nasao met laeng a lugar.
Sakbay ti insidente, iti biktima ken kakadwa na a trabahador ken nag-iinom ti makabartek.
Base iti naawat a report manipud La Union Police Provincial Office (LUPPO), maturog koman iti biktima idi maipagarop a naikaglis bayat a magmagna iti napitak ket aksidente a naikapet na ti ima na iti saan na nga impagarop a kable ti koryente.
Inarayat dagiti kakadwa na a trabahador ket inturong da iti ospital babaen iti tulong ti nagresponde nga ambulansiya ti Bureau of Fire Protection ti ili a Bauang, ngem saan dan a naidanon a sibibiag ti biktima iti pagagasan.
Naiproklama a d-o-a ni Gagasa babaen kenni Dr. Amerencio Ines.
