LA UNION – HOME OF HOPE iti inyawag ti Provincial Government of La Union (PGLU) iti Provincial Quarantine Facility para kadagiti COVID-19 patients, a nakatuding a manglukat ti operasyon na ita nga aldaw, May 1, 2020.
Iti Home of Hope a masarakan iti Government Center, Barangay Sevilla, San Fernando City, ket maysa a fully-airconditioned facility nga addaan ti 26 beds ken addaan ti gender-sensitive design.
Iti nasao a pasilidad a maiturong dagiti confirmed ken suspected COVID-19 patients, ken maipaayan da iti psycho-social support kabayatan ti pannaka-quarantine dagitoy.
Daytoy ket maysa laeng kadagiti wagas ti PGLU tapno prebentaran iti panagwaras ti virus ditoy probinsiya.
Kabayatanna, nakasagana metten a mausar iti isolation facilities para kadagiti Covid 19 patients a maipasidong iti isolation treatment idiay ili ti Caba, La Union.
Kabayatanna, iti La Union ket nakapasidong itan iti General Community Quarantine (GCQ) manipud iti dati nga ECQ epektibo ita nga aldaw, Mayo uno.
Nupay kasta, agtultuloy ti nairut a pannakaipatungpal dagiti allagaden maiyannurot iti GCQ tapno maliklikan iti COVID 19 kas iti panagugas ti ima, umno a panagsuot ti face mask, ken social distancing.
Iti probinsya a La Union ket temporaryo a maipasidong iti GCQ bayat a maur-uray iti desisyon ti National Inter Agency Task Force (NIATF) seknan iti kadawatan ti PGLU nga extension ti ECQ.
