Inimbitaran ni Philippine National Police (PNP) Chief Police General Nicolas Torre III ni Vice President Sara Duterte sadiay National Headquarters ti PNP tapno ipakita ti panagusar kadagiti kabaroan ken moderno a teknolohiya iti panangisayangkat kadagiti police operations ken tapno mapapartak ti panagresponde ti hanay da.
Kasaruno daitoy ti panangbabalaw ti Bise Presidente iti inisyatibo ti liderato ni Torre kas baro nga hepe ti organisasyon a papigsaen ti police visibility ti hanay da kadagiti kakalsadaan kas ‘outdated’ a stratehiya.
Kinuna met ti hepe nga addaan da iti kabaroan nga arawaten kas kadagiti drones, CCTV cameras, body cameras, ken dadduma pay a mangpapartak ti panagresponde iti 911 emergency ti publiko.
Kabayatanna, laksid ti pammabalaw kadagiti inisyatiba ket kinuna ni Torre a prioridad latta ti kapulisan ti panangpapigsa ti police visibility ken panangpapartak ti panagresponde ti hanay kadagiti pagkasapulan ti Pilipino.
