BR LA UNION – Nagkari ni Philippine National Police (PNP) Chief PGen. Nicolas Torre III nga iyemplementar na ti 8 hours shift kada aldaw a panagtrabaho dagiti pulis.
Kinuna na a tao met laeng dagiti pulis, saan a makina, nga agkasapolan ti panaginana.
Iti agdama, sumagmamano a pulis ket agtrab-trabaho ti nasurok 72 hours kada lawas, ket impaganetget ni Torre a ti nalabes nga oras a panagtrabaho dagiti pulis ket mailabsing iti labor code, a mangibagbaga a rumbeng nga 40 hours laeng ti allowed nga oras a panagtrabaho iti uneg ti maysa a lawas.
Tarigagay ni Torre nga aramiden dagiti pulis a lalo nga agpokus iti trabaho da iti komunidad ken iti performance dagitoy, a saan ketdi a mat-maturog kabayatan ti oras ti trabaho.
Imbaga ti PNP Chief a nu adda makita a mat-maturog a pulis bayat a naka-duty ket i-report a dagus iti opisina, tapno ma-aksiyunan dagitoy a parikot, ket posible a paka-ikkatan iti serbisyo.
Kabayatanna, kasukat ti panangipatungpal ti 8 hours working shift ket tarigagay ti hepe a makita ti maysa a kalidad a serbisyo manipud kadagiti pulis ken papigsaen ti police visibility iti masakopan dagitoy.
Kabayatanna, aminado ni General Torre a nangato ti pressure a naipabaklay kenkuana kalpasan a nadutukan kas kaunaan a PNPA graduate a mangidaulo iti Philippine National Police Academy.
Nupay kasta, nagyaman ni Torre kenni President Ferdinand Marcos Jr. iti impaay na a kumpiyansa ken talek kenkuana ket nagkari nga aramidenna ti kabaelanna tapno agbalin a proud kenkuana dagiti 8,000 strong PNPA Alumni.
