Nagpakdaar ti Civil Service Commission (CSC) laban kadagiti grupo ken indibidual a mangar-aramat iti nagan ken logo ti komision tapno makaallilaw ti publiko. Inpaganetget ti CSC idi Mierkules, Hulio 22, nga awan ti otorisado a review center, organisasion, wenno indibidual a mabalin a mangusar ti nagan wenno logo daytoy para iti promotion, recruitment, solicitation, wenno enrollment.
Inruar ti komision iti pakdaar kalpasan a makaawat dagiti reports seknan kadagiti grupo nga agpampammarang nga adda ti koneksion na iti CSC tapno makaallukoy wenno makaallilaw ti publiko.
Inlawlawag met ti ahensia a saan daytoy a mangisaysayangkat ti review classes, mangilaklako ti exam reviewers, wenno mangipapaay ti review materials para iti Career Service Examination–Pen and Paper Test (CSE-PPT), karaman iti nakatuding nga exam inton Agosto 9, ken dadduma pay nga exam a sakop ti komision.
Segun kenni CSC Chairperson Marilyn Yap, saan nga agduadua iti komision a mangipila ti maitutop a legal case kontra kadagiti karaman.
Mabalin met a sumango iti kaso a kriminal ken pannakaibalud iti sinoman a mapaneknekan nga agus-usar iti nagan ken logo ti CSC iti pananglimlimo.###
