LA UNION – Palubosan ti Civil Service Commission (CSC) Region One dagiti examinees nga agusar ti facemasks ken agitugot ti alcohol ingkaso a matuloy ti eksaminasyon.
Daytoy ket paset pay laeng iti panagannad kontra iti COVID-19.
Iti pannakiuman ti Bombo Radyo La Union kenni CSC Region One Chief Human Resource Specialist Marichu Cuison, kinuna na a saan da a lapdan dagiti examinees nga agusar ti facemask kas paset iti maipatpatungpal a preventive measure iti agraraira a COVID-19.
Impaganetget ni Cuison, siguradwen da nga awan ti makapag-cheat wenno agsaur iti eksaminasyon.
Iti agdama ket awan pay met ti abiso manipud Civil Service Commission (CSC)-central office, nu makanselar ti eksaminasyon a nakatuding koma inton Domingo, March 15.
Maipalagip nga umabot iti 18, 929 dagiti examinees iti intero a Region One.
Manipud iti nasao a bilang, 15, 810 dagiti mangala ti professional examination bayat a 3,119 iti subproof.
