LA UNION – Maipatungpal ti culling operation iti amin a taraken a baboy, manipud ground zero agingga iti 500-meter radius, kadagiti apektado a barangay ti African Swine Fever wenno ASF idiay Naguilian, La Union.
Maiyannurot daytoy iti impaulog nga Executive Order No. 2020-52 a pinirmaan ni Mayor Nieri Flores.
Maipatungpal ti culling operation kalpasan a kumpirmaren ti Provincial Veterinary Office (PVEt) a nagpositibo iti sakit nga ASF dagiti baboy a naalaan ti blood sample ken naipasidong iti blood test.
Naamwan a manipud iti lima a barangay a naka-takwatan itay nabiit iti kellaat a panagpatay dagiti taraken a baboy, nagwaras daytoy iti tallo pay a barangay.
Base iti paka-ammo ti Naguilian-LGU, nagramaramen ti ASF iti walo a barangay, kas idiay Baraoas Sur, Bariquir, Cabaritan Sur, Ribsuan, San Isidro, Lioac Norte, Casilagan, ken Magungunay.
Dagus met a nangipatungpal iti lokal a gobyerno kadagiti addang tapno malapdan iti lalo pay a panagwaras ti ASF.
Malaksid iti culling operation, awan pay laeng iti mapalubosan a sumrek ken rumuar a karne ti baboy ken dadduma pay a meat products kadagiti nasao a lugar, temporaryo a maipawil ti agparti ti baboy, maipatungpal ti nairut a quarantine checkpoints iti amin a barangay, ken dadduma pay a containment measures kontra African Swine Fever.
Naipanamnama met iti maited nga ayuda kadagiti apektado a hog raisers.
Iti ASF ket maibilbilang a deadly viral disease a pakat-katayan dagiti taraken a baboy.
Awan pay iti nadiskubre nga agas a panglaban iti nasao a sakit.
