BR LA UNION – Inlawlawag ti Department of Agriculture a karaman dagiti minimum wage earners iti programa ti gobierno a P20 per kilo a bagas.
Inaramid ti ahensiya ti anunsiyo kagiddan ti panangiyuswat ti DA a kadwa da iti DOLE iti nationwide roll out ti nasao a programa.
Daytoy nga addang ti DA ken DOLE ket panangtungpal iti direktiba ni Presidente Ferdinand Marcos Jr. tapno mapalag-an ti financial burden dagiti Pilipino a karaman kadagiti vulnerable sectors ti kagimongan.
Iti statement ni Agriculture Secretary Francisco Tiu Laurel Jr., impaganetgetna nga agtultuloy dagiti ar-aramiden nga addang ti ahensiya tapno masigurado ti kabaelan a presyo ti taraon ditoy pagilian.
Mamati ni Labor Secretary Bienvenido Laguesma a dakkel a tulong daytoy kadagiti minimum wage earners, nangruna ket saan nga umanay iti mat-matgedan da.
Maibasar iti datos ti ahensiya, dandani 120,000 a mangmangged ditoy pagilian dagiti maibilang a minimum wage earners manipud iti nasurok a 500 nga establisimiento.
