Impasiguro ti Department of Agriculture (DA) a makaawat iti fuel subsidy dagiti mangngalap ken mannalaon nga apektado ti staggered wenno in-inut a pannakaipatungpal ti big-time oil price hike ita a lawas.
Segun kenni Agriculture Sec. Francisco Tiu Laurel Jr., nangitukon da ti ₱150 million wenno tig-₱75 million a pondo para ti fuel subsidy babaen ti 2025 General Appropriations Act.
Kinuna met ni Agriculture spokesperson Assistant Secretary Arnel de Mesa nga iruar da iti pondo apaman dumanonen iti US$80 ti presyo ti kada bariles ti Dubai crude oil.
Posible kunana a saan pay a marikna ita ti epekto ti gyera idiay Middle East para kadagiti presyo ti abono ken mabalin a marikna daitoy iti maudi a paset ti tawen. Impasiguro met ti opisal nga adda iti umdas a supply ti fertilizer ditoy pagilian agingga agleppas ti 2025.
