Immanamong dagiti Hepe ti Department of Agriculture (DA) ken Department of Trade and Industry (DTI) iti lifestyle check initiative ni Presidente Ferdinand Marcos Junior para kadagiti amin nga opisyales ti gobierno nu kasta ket malapdan iti posible a korapsyon.
Maipalagip nga imbilin ti Presidente ti pannakaisayangkat ti lifestyle checking kadagiti kameng ti linteg nga umuna a maiyuswat kadagiti adda iti Ehekutibo gapo paylaeng iti agtultuloy nga imbestigasyon seknan dagiti maanomalya a flood control projects.
Iti biang ni Agriculture Secretary Francisco Tiu Laurel Junior, suportado na iti nasao nga inisyatibo ti presidente ken innayon a makatulong daitoy tapno maibutaktak ti posible a misconduct wenno madi nga aramid dagiti pampubliko nga opisyales.
Saan metten a baro daitoy para iti sekretaryo agsipud ta kas maysa a negosyante ket kinunana nga ar-aramiden na metlaeng daitoy iti bukod na a kompanya.
Para met iti biang ni Trade Secretary Ma. Cristina Roque, inwaragawag na a ti kinapudno na ket rinugianen ti DTI a sungbatan ti “accreditation for sale scheme” a nakainaigan dagiti contractors ti Philippine Contractors Accreditation Board (PCAB).
