LA UNION – Dakkel ti naitulong ti pagilian a Kuwait kadagiti Overseas Filipino Workers (OFW) nga agtatrabaho sadiay.
Segun kenni Glory Nones a sumagmamanon a dekada nga agtrab-trabaho iti nasao a pagilian, kinuna na a dakkel latta ti naitulong ti nasao a pagilian kadagiti pada na nga OFW gaputa uray kasatnu ket napagturposda ti panagadal dagiti anak dagitoy.
Iti pannakiuman met ti Bombo Radyo kenni Helen Jimenez, taga Bauang, La Union ken agtrab-trabaho idiay Kuwait, kinuna na nga arigna nairamanen ti amin gapu iti video maipapan iti panangrescue ti embahada kadagiti OFW.
Kinuna pay ti employer daytoy nga arigna umap- apoy ti susik iti baetan ti Pilipinas ken Kuwait ngem mamati lumammiisto met laeng iti umno a panawen.
Segun pay kenni Jimenez, narabaw nga rason ti susik iti baetan ti dua a pagilian tapno pagawiden dagiti OFW.
Saan kuna na a dagus nga mapa-awid dagitoy nangruna no napintas iti pannakilangen dagiti employer kadakuada.
No idileg, saan laeng a doble ngem ketdi triple pay ti suweldo dagitoy, banag a narigat a sapolen ditoy Pilipinas.
Mamati met daytoy a no adda agawid iti Pilipinas ket dagiti laeng apektado ken distressed, ngem saan a kas kadakuada a napagasatan ken adda iti nasayaat nga ima dagiti amo.
