BALAOAN, La Union – Nagpatigmaan ti La Union Police Provincial Office (LUPPO) dagiti agkabalubal iti politika ken uray kadagiti supporters dagitoy a saan nga agaramid ti scenario tapno pagparangen a nariribok ti eleksyon idiay ili ti Balaoan, La Union nga adda iti sidong ti election hotspot kas category red.
Iti pannakiuman ti Bombo Radyo kenni Col. Ricardo Layug Jr., director ti LUPPO, kinunana nga adu dagiti timpuar nga impormasyon wenno damag a nagwaras iti nasao nga ili ken uray ti social media maipapan ti maipagarup a mapaspasamak a political harassment.
Magsipulong iti kwerpo ti pulisya iti agsinnumbangir a benneg ken agpipinnabasol.
Sigun kenni Col. Layug, amin a report a maaw-awat ti pulisya ket tamtamingenda ngem adda dagiti sumagmamano a mapagdudua-an nga impormasyon.
Agsidsiddaaw ti opisyal kadagiti dadduma a reklamo a maaw-awatda gapu ta sumagmamano nga oras wenno aldaw ti napalabas ti maipagarup a napasamak ket sa laeng umasideg kadakuada ti agpapabigbig a complainant.
Inallukoy ni Col. Layug a dagus nga idanon iti opisinada wenno iti election officer ti aniaman a reklamo dagitoy ken saanen koma a palabasen pay iti sumagmamano nga oras sakbay nga agipulong gapu ta nagwaras met iti nasao nga ili dagiti pulis ken suldado a nakasagana nga agresponde.
Iti agdama ket agtultuloy iti imbestigasyon kadagiti reklamo a naiyuman kadakuada ti agsinnumbangir a benneg ken mabalin a mapagsungbat iti linteg dagiti mapaneknekan nga agim-imbento laeng iti scenario wenno istorya tapno pagparangen a nariribok ti eleksyon para iti bukod nga interes wenno politika.
