LA UNION – Agyamyaman dagiti agindeg iti balay a dinalapus iti naaksidente a wagon idiay Barangay Taboc, San Juan, La Union gapu ta awan iti nadangran kadakuada.
Iti pannakiuman ti Bombo Radyo kenni Janet Zaraquin, kinunana a madamada iti panagbuyada iti misterna ti telebesyon idiay kwartoda ken makumikom dagiti annakda a kaddua dagiti padada nga ubbing nga agsungsungbat iti learning modules iti salas ti pagtaengan idi a napasamak ti aksidente.
Nagasat kinunana gapu ta awan iti nadangran kadakuada idi a dimmalapos ti wagon.
Kabayatanna, kinumpirma met ni Capt. Gerardo Macaraeg Jr., hepe ti San Juan Police Station, a nakainom ti driver iti nadakamat a lugan idi a naaksidente daytoy.
Gapu iti napasamak, nagpalagip met ti opisyal kadagiti motorista a liklikan iti aginom no agmaneho tapno maliklikan iti aksidente.
Immuna iti daytoy, maysa iti natay kabayatan a lima iti nasugatan a pasahero ti wagon a naaksidente iti nasao a lugar.
Dagiti biktima ket bin-ig a ganganaet a 10 a bulanen nga agnanaed idiay San Juan kabayatan ti community quaratine.
