LA UNION – Epektibo ita nga aldaw ti Biyernes, July 9, maipatungpal dagiti guidelines kagiddan iti pannakaipasidong iti San Fernando City, La Union iti General Community Quarantine, GCQ.
Maiyannurot iti Executive Order No. 113-2021 wenno EXECUTIVE ORDER IMPLEMENTING THE GENERAL COMMUNITY QUARANTINE GUIDELINES iti intero a syudad manipud alas 12:00 itay tengngat rabii ken agpatingga iti alas 11:59 ti rabii inton JULY 22, 2021.
Nakailanad iti allagaden nga impaulog ti lokal a gobyerno ti syudad babaen kenni Mayor Herminigildo Gualberto, a nainget a maipatungpal ti home quarantine iti amin a residente ditoy syudad.
Dagiti indibiduwal nga agtawen ti 18 agpababa ken nataengan nga agtawen ti 65 agpangato ket nabalakadan nga agpirme laeng iti babbalay da, malaksid nu kasapolan.
Limitado iti biyahe dagiti pangpubliko a traysikel ditoy syudad.
Amin nga establisimento ket mabalin nga aglukat, ngem nasken a masurot iti naituding a kapasidad ken oras a panaglukat ken panagrikep.
Dagiti laeng saan a mapalubosan nga ag-operate ket dagiti pag-iinuman, pagsinyan, internet cafe ken dadduma pay a recreational venues, amin a pagsusugalan, amusement parks, ken dagiti outdoor sports courts.
Nakalukat met ti auxillary wet market, manipud alas 6:00 ti agsapa agingga alas 5:00 ti malem bayat a dagiti shopping malls ket aglukat da ti alas 8:00 ti bigat agingga alas 5:00 ti malem.
Maipawil dagiti ambulant vendors bayat a kadagiti talipapa ken sari-sari stores ket nakalukat manipud alas 5:00 ti agsapa agingga alas 6:00 ti sardam.
Dagiti establisimento a mangipapaay ti essential services kas koma dagiti botika ket agpatingga laeng ti alas 11:00 ti rabii idinto a dagiti convinience stores ket alas 9:00 ti rabii.
Maipatungpal ti curfew agingga alas 11:00 ti rabii ken mapawaywayan iti implementasyon ti liquor ban agingga alas 12:00 ti tengngat rabii inton July 23, 2021.
Impaganetget ti lokal a gobyerno iti nainget a panangsurot iti Apat Dapat Rule tapno agballigi iti tarigagay a lapdan iti lalo pay a panagwaras ti COVID 19.
Iti apat dapat rule ket dagiti minimum health standards a kas ti nawaya a sirkulasyon ti angin, suruten ti maysa wenno nasur-surok pay a distansiya iti tumunggal maysa, agusar ti face mask ken face shield, ken agingga laeng 30 minutos ti pannakisarita iti maysa a tao.
