Naipasidong iti ‘public interview’ ti Judicial and Bar Council dagiti dadduma nga aplikante ti posisyon ti kina-Ombudsman idi kalman, aldaw ti Huebes, Agosto 28.
Immun-una a naipasidong ket ti agdama a Chairperson ti Philippines Competition Commission a ni Michael Aguinaldo para ti public interview naangay idiay Korte Suprema, ciudad ti Maynila.
Iti interview ket nadamag ti aplikante mainaig ti isyu dagiti nagduduma a mapaspasamak iti pagilian ken nu kasatno na a sangwen dagitoy apaman nga isuna iti madutokan kas Ombudsman.
Insungbat ni Aguinaldo iti kinapateg ti integrasyon ti Artificial Intelligence wenno AI iti Office of the Ombudsman. Kabayatan met iti panagdamdamag ti Judicial and Bar Council panel of interviewers ket nasukimat da ti aganay sangapulo a kakabagian na iti serbisyo ti gobierno.
Mainaig iti daitoy ket maysa ti maysa pay nga aplikante a ni Undersecretary Romeo Benitez ti Department of Interior and Local Government a nadamag maipanggep ti Statement of Assets, Liabilities, and Net Worth wenno ti SALN nu nasken a daitoy a dokumento ket rumbeng a maipubliko.
Kabayatanna, nadakamat met dagiti ‘ghost projects’ ti flood control iti panagdamag ni Senator Alan Peter Cayetano kadagiti kandidato.
Iti pannakiuman ti Bombo Radyo ket inbinglay ti senador ti kinapateg ti public interview agsipud ta kayat nga nga agbalin nga aktibo ti sumaruno nga Ombudsman.
Ita nga aldaw ket agtultuloy ti panagdamag ti Judicial and Bar council kadagiti dadduma nga aplikante bayat nga inton bulan met ti Setyembre ket manannama a maipasidong met ti intervierw ti agdama a sekretaryo ti Department of Justice a ni Jesus Crispin Remulla.
