BAGULIN, La Union – Nakasaganan a mangpasangbay kadagiti turista nga agturong idiay Kudal People’s Park dagiti opisyal iti Barangay Tagudtud, Bagulin, La Union ita a mangrugrugin ti Christmas break.
Kinuna ni Tagudtud Punong Barangay Sagani Lagasit, namnamaendan a dupudupen iti turista ti nasao a parke lalo ita a napalukayan iti COVID-19 alert status.
Sigun kenni Lagasit, ipatungpalda ti health protocols para kadagiti agpasyar a maiyannurot ti patakaran nga inyatnag iti lokal a gobyerno iti Bagulin.
Ipatungpalda met iti curfew hour idiay Kudal People’s Park tapno maikkan iti gundaway a makainnana ti aglawlaw.
Nagpalagip pay ti punong barangay a maipawil iti agiserrek iti arak wenno nasanger nga inemen iti paraangan ti parke, karaman iti panagsegarilyo ken panagmama.
Kidkidawen pay ni Lagasit kadagiti kadagiti agpasyar a pagtalinaeden a nadalus ti parke ken agannad iti panagbiyahe gapu ta naparsed ken kurbada iti kalsada nga agturong iti nasao a lugar.
Malaksid a marikna iti nalam-ek a temperatura ket masarakan pay idiay Kudal People’s Park ti naduma-duma a kita iti agkakapintas a mula, kangrunaan iti mayana.
Adda pay dagiti naaramid a lamisaan ken tugaw kadagiti sirok ti Pine trees, kabilang dagiti naipasdek a kalapaw a mabalin a pakaaramidan iti picnic ti pamilya wenno aggagayyem.
Maysa met a viewdeck iti naibangon tapno makita ken lalo pay a maaprisyar dagiti turista a buyaen iti aglawlaw ti parke, ken matannawagan ti kabankantayan ti Cordillera, ti West Philippine Sea ken dadduma pay a lugar ti La Union.
Kabilang pay a naipasdek iti nasao a lugar iti nalinis a comfort room.
Iti P10 laeng nga entrance fee ket mabalinen nga i-enjoy ti tunggal tourista iti agpasyar ti nasao a lugar.
Ti Kudal People’s Park ket silulukat iti inaldaw manipud alas-6 ti bigat agingga iti alas-7 ti rabii.
