LA UNION – Nagpadispensar dagiti barangay officials kadagiti maseknan kalpasan a nag-trending ti video maipapan iti panangkabilda iti maysa a 14-anyos a barito idiay Barangay Butubut Norte, ili ti Balaoan, La Union.
Sigun kenni Butubut Norte Barangay Chairman Jaime Ordinario, mapanda laeng koma mangisayangkat ti imbestigasyon ken kasarita ti nasao a barito idi a napasamak ti panangkabil.
Iti palawag ni Ordinario, nagbalin a nagubsang ken nabastos iti panagsarita ti barito isu a nalaw-ananna daytoy a natapis.
Kinuna met ni Butubut Norte Kagawad Pablo Bayota, saanna met a nateppelan ti bagina gapu ti saan a nasayaat a sungbat ti barito kadakuada nga opisyal.
Aminado ni Bayota a natapis ken pinarusepanna babaen ti tumengna ti barito.
Agpada a kinuna dagiti dua a nasao nga opisyal ken ni Chief tanod Ernesto Ibay a karaman ti nadakamat a barito iti grupo iti nagsaruno a panangkabil kadagiti padana nga agtutubo idiay barangayda.
Kinuna dagiti opisyal, karaman kadagiti agpapaanawa wenno mangriribok iti barangayda ti grupo ti nasao a barito.
Tarigagayda laeng koma nga ipaayan ti disiplina iti grupo ti nadakamat a barito.
Kabayatanna, kinuna ti nasao a barito ken ti maysa pay a minor de edad a biktima a saan a naikalintegan iti inaramid kadakuada dagiti opisyal ti barangay a nangkabil kadakuada.
Imbatadna a nasayaat met iti pannakaisango ken pannakisaritana kadagiti opisyal iti barangayda.
Agpada kinuna dagiti biktima a saanda a mapakawan dagiti barangay officials uray no nagkiddaw dagitoy iti dispensar.
Imbaga met ti nanang ti nasao a barito, a nasakit iti nakemda kalpasan a nabuyada ti nag-viral a video maipapan ti panangtumeng iti anakda.
Saan a pudno a kinunana a konsentidorda a nagannak kas ti nakuna ti opisyal.
Impaganetget ti nanang a mangidatag daytoy iti reklamo kontra kadagiti nasao nga opisyal.
