LA UNION – Agtaltalinaed pay laeng a burburtiya para iti pulisya ti motibo iti napasamak a panagraot ken pammaltog iti uneg ti computer shop a nakatayan iti tallo a mangmanged daytoy idiay syudad ti San Fernando, La Union.
Iti pannakiuman ti Bombo Radyo kay LtCol. Silverio Ordinado Jr., spokesperson ti La Union Police Provincial Office, kinunana a madama nga ad-adalen ti Police Cyber Crime Group dagiti nakolekta a video footeges manipud kadagiti CCTV camera a nakapalikmot iti Shania Kenny Merchandise ken iti dadduma pay a pasdek.
Daytoy ket para iti posible a panagtukoy kinunana kadagiti suspek a rimmaot iti nasao a computer shop.
Sigun kenni Ordinado, saanda pay laeng a makaited iti konklusyon maipapan ti insidente gapu ta agtultuloy iti panagkalapda ti ebidensya ken testimonya dagiti testigo.
Ngem saan met nga ipapaigid ti pulsiya iti panag-imbestigar no adda ti pakainaigan daytoy iti napasamak a pammaltog ken gandat a panangpapatay iti makinkukua ti nasao a computer shop iti maysa a branch wenno sangay idi July 2016 idiay syudad ti San Fernando.
