LA UNION – Agtalinaed iti sidong ti General Community Quarantine (GCQ) wenno “new normal” iti probinsiya a La Union.
Daytoy iti kinumpirma ti Provincial Government of La Union (PGLU) kalpasan a saan nga aprubaran ti Inter- Agency Task Force (IATF) iti kadawatan nga ilayon nga ipasidong iti Enhanced Community Quarantine (ECQ) iti probinsiya.
Nabukel iti nasao a desisyon kabayatan ti Inter-Agency Task Force for the Management of Emerging Infectious Diseases (IATF-EID) meeting idi Mayo uno.
Maipalagip a nagpaso iti Enhanced Community Quarantine (ECQ) nga indeklara ni President Rodrigo Duterte tapno parmeken iti COVID 19 pandemic idi Abril 30.
Manipud ECQ, nakapasidong itan ti La Union iti General Community Quarantine (GCQ).
Nupay kasta, agtultuloy a maipatungpal dagiti nairut nga allagaden ken protocols iti sidong ti GCQ.
Partikular iti panagtalinaed iti uneg ti balay (home quarantine), social distancing, panagsuot ti face mask, ken panang-praktis iti good personal hygiene.
Naminsan pay a nagpanawagan iti lokal a gobyerno ti La Union babaen kenni Gov. Pacoy Ortega, nga itultuloy dagiti wagas a nasurot ken nagapwanan idi panawen ti ECQ tapno labanan iti coronavirus disease ken maprotektaran ti La Union kontra iti makapatay a sakit.
Kabayatanna, pormal nga aglukat ita nga aldaw, Mayo 4, iti amin nga opisina nga adda iti sidong ti lokal a gobyerno tapno maminsan manen a makapag-serbi iti ili.
Nupay kasta, maipatungpal ken masurot iti baro nga schedule, a 4-day work week.
Nakalukat iti opisina dagiti lokal a gobyerno, manipud Lunes agingga Huwebes iti oras ti alas 8:00 a.m.- 4:00 p.m.
