Naminsan manen nga binnallaagan ti Department of Labor & Empolyment Region 1 dagiti employers iti panangiyemplementar dagitoy iti Occupational Safety and Health Standards wenno OSH Law iti tranaho gapu ti nakita iti ahensya a nababa a bilang dagiti establishimento wenno opisina a mangipatpatungpal iti nadakamat a pagannurutan.
Ti OSH law ket linteg a mangipatungpal iti polisiya kadagiti establishimento wenno opisina tapno maipanamnama ti kinatalged dagiti empleyado, management ken dagiti kliyente manipud iti peggad a napasamak iti trabaho.
Base iti datos ti DOLE Region 1, manipud bulan iti Enero agingga Agosto ti agdama a, dumanon iti 1,024 nga establishimento ti nabisita ken nainspeksyon iti nadakamat nga opisina.
Iti interview ti Bombo Radyo La Union kenni DOLE Region 1 Labor Communication Officer Justin Paul Marbella, kinunana a ti nadakamat a bilang ket 80.12% kadagiti establisyimento ket sumursurot iti general labor standards nga umno a panagpasuweldo kadagiti empleyado ken napintas nga employer ken employee relationship nupay 28.31% laeng kadagitoy kunana ti mangiyem-implementar iti linteg nga banag a makapaalarma.
Segun pay kenni Marbella, no maduktalan a ti maysa nga establishimento wenno opisina ket saan a mangipatpatungpal ti linteg ket maimbestigaran daytoy ken posible a mamulta ken maiparikep.
Tarigagay ti nasao a linteg nga ipanamnama a natalged ti pagtrabahuan dagiti empleyado.
Iti agdama, nainget ti inspeksyon nga isaysayangkat ti DOLE kadagiti naduma-duma nga establishimento iti rehiyon tapno ipatungpal ti linteg.
