LA UNION – Agtaltalinaed pay laeng kadagiti evacuation center iti 79 a pamilya wenno 271 katao nga apektado iti nakaro a panaglayus idiay probinsya ti La Union.
Sigun kenni Office of Civil Defense Regional Center-1 spokesperson Mike Sabado, kinunana a manipud idiay ili ti Bauang ken syudad ti San Fernando iti nadakamat a bilang dagiti immakar nga iti agdama ket agpalabas ti oras kadagiti naduma-duma nga evacuation centers agingga a saan pay a simmayaat ti kasasaad iti panawen.
Kaadduan kadagiti immakar ket agnanaed idiay igid ti karayan ken sabangan.
Kabayatanna, sigun met kenni Department of Social Welfare and Develpoment Regional Office-1 information officer Darwin Chan, nakasaganan ti 11,762 family food packs no agkiddaw ti lokal a gobyerno ti La Union wenno iti dadduma pay a probinsya ti tulongda para kadagiti kakailyan a nakaro a naapektaran ti kalamidad.
Iti agdama, saan pay laeng a napalubusan a makaawid dagiti residente kadagiti bukodda a babbalay gapu ta posible a maulit ti kasasaad iti kalman a naglupyas iti danum kadagiti karayan ken sabangan gapu ti agtultuloy panagtudtudo.
