LA UNION – Target ita iti city health office (CHO) ditoy syudad ti San Fernando a bisitaen dagiti pampubliko a pagadalan ditoy syudad.
Daytoy a ganwat ket addaan tarigagay nga ipasidong iti urinalysis wenno panangamiris ti isbo dagiti estudyante iti elementarya, manipud Grade 1 to Grade 6, kadagiti nasao a pagadalan.
Iti eksklusibo nga interview ti Bombo Radyo La Union kenni City Health Officer Dr. Eduardo Posadas, kinuna na a sungbat da daytoy iti ngumatngato a kaso ti Chronic Urinary Tract Infection disease wenno UTI kadagiti ubbing.
Impaganetget ni Dr. Posadas a kasapolan a maipatungpal a dagus ti nasao a ganwat tapno saan a manayunan ken kumaru iti sakit dagiti ubbing, a posible nga agbanag iti pannakadadael ti bato/kidney ken panagpa-isidong iti dialysis, nu mabaybay-an.
Adda iti pakabuklan a 26 a pampubliko a pagadalan ditoy syudad ket target ti CHO kadwa da iti DepEd ken BHWs, nga unaen a bisitaen dagiti pagadalan iti upland barangays.
