Impaganetget ti National Bureau of Investigation nga awan ti rumbeng a pakaalarmaan ti publiko mainaig kadagiti insidente ti kidnapping ditoy pagilian.
Daitoy ket kasaruno ti kallabes a panagkidnap ken panangpapatay iti negosyante a Filipino-Chinese a ni Anson Que.
Nagpalagip ti ahensya kadagiti umili a Pilipino ken iti Filipino-Chinese community a saan a madanagan agsipud ta addan dagiti aksyon nga ar-aramiden ti gobierno.
Segun kenni National Bureau of Investigation Director Jaime B. Santiago, sumagmamano kadagiti organisasyon dagiti Filipino-Chinese ditoy Pilipinas ket maseknan gapo iti insidente.
Nupay kasta, kinuna ti direktor nga idadauloanen ti Department of Justice, Philippine National Police, ken dadduma pay nga ahensya ti gobierno iti panagresolbar kadaitoy nga isyu.
Nagsapata ti opsiyal a makasiguro ti publiko iti madagdagos nga aksyon kadagiti maipadpadamag a kaso dagiti panagkidnap.
Iti sabali a bangit, impannakkel met ni National Bureau of Investigation Director Jaime B. Santiago ti Anti-Kidnapping Task Force nga isu ti nakatukon iti panagresolbar iti nasao a kaso.
Inlawlawag na ti kinapateg a maikkan-dalan ti nagduduma nga ahesnya ti gobierno tapno mapainget pay ti koordinasyon ti tunggal maysa.
Segun pay kenkuana, babaen ti Task Force Anti-Kidnapping ket nawaya a makaibinglay ti impormasyon iti National Bureau of Investigation ken Philippine National Police babaen ti panangidaulo ti Department of Justice iti isaysayangkat da nga imbestigasyon.
