LA UNION – Linawlawagan ni Asst. Regional Director Kathleen Salayog ti Land Transportation Office Region 1 (LTO-1) iti sumagmamano nga isyu maipapan iti maisay-sayangkat nga emission testing kadagiti behikulo.
Iti eksklusibo a pannakiuman ti Bombo Radyo La Union kenni Salayog, kinuna na nga adda laeng iti sumagmamano a panagbaliw iti proseso ti emission testing, maiyannurot iti impaulog a direktiba ti Department of Transportation (DOTr).
Segun kenni Salayog, dagiti behikulo nga addaan ti 4,500 kg gross vehicle weight nga agpababa ket agpaisidong iti private motor vehicle inspection center (PMVIC) para iti physical inspection ken road test.
Bayat a dagiti bus ken truck ket agpaisidong met iti Private Emission Testing Center (PETC) para iti smoke testing.
Ngem inlawlawag ti opisyal a dagiti behikulo a makitaan ti problema iti PMVIC wenno bagsak iti emission testing ket i-require ti LTO nga agpa-test iti sidong ti PETC.
Impaganetget ni Salayog nga awan ti multa a maipatpataw kadagiti behikulo a maipasidong iti PETC nudiket bayad iti sabali manen a proseso iti emission testing.
Iti emission testing ken vehicle inspections a pakairamanan iti roadworthiness ket maysa kadagiti kangrunaan a requirement para iti panagpa-rehistro ti lugan ken renewal iti motor vehicle registration.
Innayon ni ARD Salayog nga iti PMVIC ket maysa a kabarwanan a proseso wenno teknolohiya iti pannaka-amiris iti amin a klase ti behikulo, tapno masiguro a natalged a maibiyahe iti kalsada.
Kabayatanna, impasigurado pay ni Asst. Regional Director Kathleen Salayog a matiliw dagiti agman-maneho iti motorsiklo ken kotse a narengreng ti andar wenno tambutso na, agsipudta mailabsing daytoy iti paglintegan.
Asst. Regional Director Kathleen Salayog
