Dagiti karaman iti vote buying, namnamaen a maaresto – La Union Police
LA UNION – Nagpatigmaan ti pulisya nga arestarenda dagiti karaman ti vote buying kagiddan ti barangay ken Sangguniang Kabataan election iti probinsya a La Union.
Iti pannakiuman ti Bombo Radyo kenni C/Ins. Silverio Ordinado, spokesperson ti La Union Police Provincial Office, kinunana nga awan pay ti pakasaritaan a nasentensyaan maipapan ti panaglakuan ti botos kada adda ti mapasamak nga eleksyon.
Sigun kenni Ordinado, saanda nga agdudua nga arestaren dagti botante nga aglaklako ken dagiti kandidato nga agatgatang iti botos no maaktuan dagitoy iti nasao nga aramid.
Innallukoy met ti pulisya dagiti umili nga agipulong idiay opisinada wenno iti Commission on Election (COMELEC) no adda ti mapaspasamak nga panaglakuan ti botos iti lugarda ken segurado a ruma-ot dagitoy.
Kabayatanna, nagpalagip met ti opisyal kaadagiti umili a sumurot iti pannakaipatungpal ti COMELEC gun ban a mangruygi inton alas-12:00 ti tengnga ti rabii. (Absalom Flores)
