Nangisayangkatda iti rally tapno ipalagip kenni Pangulo Rodrigo Duterte dagiti inkarina para iti pagsayaatan dagiti mangmangged a kanayunan a sweldo ken panangresolba ti kinakurapay.
LA UNION – Nangisayangkat met iti tignay-protesta iti naduma-duma a sektor idiay city plaza iti suidad ti San Fernando, La Union kagiddan iti pananglagip ita nga aldaw iti Labor Day.

Iti pannakiuman ti Bombo Radyo kenni Lerry Buazon ti Confederation for Unity Recognition and Advancement of Government Employees (COURAGE), nangisayangkatda iti rally tapno ipalagip kenni Pangulo Rodrigo Duterte dagiti inkarina para iti pagsayaatan dagiti mangmangged kas iti kanayunan a sweldo ken panangresolba ti kinakurapay.

Nalipatanen kinunana iti pangulo dagiti imbagana a nasken nga ikkan a dagus iti solusyon ti kasapulan dagiti mangmangged iti pribado wenno sangay ti gobyerno tapno marikna iti ginaawa.

Kiniddaw met ti nasao a grupo a patgan iti gobyerno ti P16,000 national minimum wage.

Mapatta-patta nga umabot iti 100 a tattao ti nakipaset iti tignay-protesta a bukbuklen iti Solidarity of Peasants Against Exploitation (STOP Exploitation)-Ilocos, TIMEK, Anak Bayan-La Union, Bagong Alyansang Makabayan-Ilocos, COURAGE, ken Ilocos Human Rights Advocates. (Abs Flores, Bombo La Union)