LA UNION – Nairut iti ar-aramiden a panagbantay dagiti otoridad iti amin a karne ti baboy a maiserserrek ken dumaldalan ditoy probinsiya ti La Union.
Daytoy ket tapno masiguro a natalged dagiti nasao a produkto konta iti maaw-awagan nga ‘african swine fever’ a sakit ti baboy a nagtaud iti sabali a pagilian.
Iti interview ti Bombo Radyo La Union kenni San Fernando City Veterinarian Dr. Flocy Decena, kinuna na a nagirut da kadagiti karne ti baboy a maiser-serrek iti slaughter house tapno masiguro a natalged dagitoy kontra iti ASF ken mapagtalinaed a swine fever free iti probinsiya.
Malaksid dayta, naka-alerto ita dagiti kameng ti Bureau of Animal Industry (BAI), Provincial Vet. Office ken Dept. of Agriculture iti isay-sayangkat da a checkpoints iti innem a quarantine area wenno entry points ditoy La Union partikular idiay ili ti Rosario, Pugo, Burgos, Sudipen tapno siguradwen a saan a makastrek dagiti infected a karne ti baboy.
Kinuna pay ni Decena a dagiti sintomas ti ASF ket kapad-pada iti cholera a sakit met laeng dagiti dingwen, a kaadda ti panaggurigor, diarrhea ken panagruar ti likido iti mata wenno agong.
Innayon na pay a napateg a maprotektaran iti swine industy ti pagilian kontra iti nasao a sakit agsipudta agbalin a dackel iti epekto daytoy iti supply ti karne ti baboy iti kanito a tumama ti sakit kadagiti babuyan, nangruna ket asideg laeng iti Pilipinas kadagiti apektado a pagilian kas ti China ken Hong Kong.
