Naipasidong iti Carbon Stock Assessment dagiti 449 a forest, fruit-bearing, ornamental, ken palm tree species sadiay Provincial Capitol Complex kas paset ti climate change action ti Provincial Government of La Union (PGLU).
Naisayangkat iti assessment ti Provincial Government–Environment and Natural Resources Office idi Hunio 22 agingga 23, 2026.
Segun ti Provincial Government of La Union, naiyusuat ti tree inventory iti nasurok-kumurang 2.68 nga ektaria ti Provincial Capitol Complex. Na-identify ken na-assess dagiti kayo babaen ti standard forest inventory methods. Narukod iti diametro ken breast height dagiti kayo, karaman ti species-specific density, tapno mapatta-patta iti aboveground biomass.
Maibasar iti assessment, dumanon ti 177,135.3 kilogram iti pakabuklan nga estimated aboveground biomass. Manipud ditoy, mapattapatta nga 83,253.6 kilogram ti carbon iti naidulin, a katupag ti 305,295.20 kilogram carbon dioxide equivalent. Inpakpakita daytoy iti napateg nga akem dagiti kayo iti Provincial Capitol Complex iti carbon storage ken climate change mitigation.
Segun pay ti Provincial Government of La Union, karaman dagiti kayo iti natural a solusion kontra ti climate change gapu ta sagsagepsepen dagitoy ti carbon dioxide manipud iti aglawlaw ken maur-urnong daytoy kas carbon stock. Makatulong daytoy iti panagkissay ti greenhouse gases para ti mas sustinable nga aglawlaw.
Agserbi iti assessment kas baseline data para iti urban forest management, tree conservation, ken dagiti environmental program ti PGLU. Manamnama met a makatulong daytoy iti evidence-based decision making para iti panangpalawa ti green spaces agturong iti resilient a probinsia.###
