LA UNION – Timpuar iti argumento iti baetan ti sumagmamano a komersiyante manipud Sablan, Benguet ken iti dua a kameng ti Burgos LGU, gaputi isyu iti RT-PCR test.
Iti eksklusibo a pannakiuman ti Bombo Radyo La Union kenni Jhonah Bitan, maysa a komersiyante manipud Sablan, Benguet kinuna na a saan da a nalapdan ti maki-argumento iti dua nga empleyado ti Burgos-LGU a karaman a mangimatmaton ti checkpoint ti nasao nga ili, gaputi maipagarop a saan a napintas a pannakitungtong kadakuada.
Nagramot daytoy idi saan a pinastrek dagiti mangimanmando ti checkpoint idiay Burgos, iti bayaw, ama, ken kabsat ni Jhonah nga agitulod koma iti kamatis ken dadduma pay a highland vegetables idiay ili ti San Juan ken San Gabriel, La Union idi kalman.
Base iti palawag ni Jhonah, kumidkiddaw ti negatibo a resulta ti RT-PCR test wenno swab test dagiti dua a kameng ti Burgos LGU kadagiti komersiyante ngem awan ti maited da, malaksid ti imet dagitoy a QR code.
Kinuna na pay a dandani dua nga oras a nakisarita dagitoy tapno makastrek da ditoy La Union ken drop and go laeng iti aramiden da.
Impagarop da ngamin a limmukayen dagiti allagaden iti panagserrek ditoy La Union gaputa idi napan a lawas ken nakastrek ken nakalabas metten iti bayaw ni Jhonah, ken saan da a kiniddawan ti swab test negative result.
Aminado ni Jhonah a nasakit ti nakem da iti saan da a pannakastrek ditoy La Union tapno ibagsak koma dagiti tagilako da a nat-nateng ken kamatis.
