Pinermaanen ni Senate President Francis Chiz Escudero ti subpoena kadagiti indibidwal ti walo a construction companies a saan a nangipatulod kadagiti representante da iti imbestigasyon ti Senado mainaig kadagiti Flood Control Projects.
Maipatulod met dagitoy a subpoena ita nga Agosto 26 kadagiti nasao a walo a constructions companies a saan a nagparang iti Senate Blue Ribbon panel.
Karaman kadagiti kompanya a na-subpoena ket ti: Wawao Builders, Topnotch Catalyst Builders Inc., Sunwest Inc., St. Timothy Construction Corp., Royal Crown Monarch Construction & Supplies Corp; L.R. Tiqui Builders Inc.; Hi-Tone Construction & Development Corp, ken Alpha & Omega General Contractor & Development Corp.
Daitoy nga addang ti Senate President ket kas panagsuporta iti isaysayangkat a bukod nga imbestigasyon ni Presidente Ferdinand Marcos Junior kadagiti maanomalya a proyekto.
Maipalagip a ninaganan ti presidente dagiti 15 a construction companies a nakaawat ti kadakkelan a porsyento ti P545-B a gatad ti flood control projects babaen kadagiti kontrata da iti gobierno.
