LA UNION – Kinumpirma ti pulisya a karaman met iti nagsasaruno a panagtakawan kadagiti kalding dagiti lima a lallaki a natiliw babaen ti police checkpoint idiay ili ti Bacnotan, La Union idi kalman.
Iti pannakiuman ti Bombo Radyo kay C/Ins. Reynaldo Soria, hepe ti Bacnotan Police Station, kinunana a base ti impormasyon a naammuanna manipud kadagiti kwerpo ti pulisya kadagiti ili ti Mabini, Asingan, ken Pozzorobio, Pangasinan ket adda iti pakainaigan dagiti suspek iti pannakapukaw kadagiti taraken a kalding kadagiti nadakamat a lugar.
Natukoy kinunana dagiti agtatakaw babaen kadagiti inaramatda a lugan ken nairupaan met laeng dagitoy iti nakaimatang ti panagtakawan kadagiti kalding.
Sigun pay kenni Soria, posible nga adda pay iti kakaddua dagiti suspek.
Maipagarup nga iturturongda dagiti ayop iti maysa a saanen a nainaganan a restaurant idiay syudad ti Dagupay, Pangasinan.
Iti agdama, naidatagen idiay piskalya ti kaso a teft kontra kadagiti suspek gapu iti panagtakaw kadagiti kalding, ken panaglabsing iti Comprehensive on Dangerous Drugs Act gapu ti panagikot dagitoy iti shabu.
