LA UNION – Pakabuklan a 250 participants manipud iti lokal a gobyerno ken MENRO iti sapasap a Rehiyon Uno iti naimbitaran ken makipaset iti maisay-sayangkat a Solid Waste Management Summit idiay Bauang, La Union nga indaulwan ti DENR-Environmental Management Bureau.
Iti pannakiuman ti Bombo Radyo La Union kenni Environmental Management Bureau – Region I Director Maria Dorica Naz-Hipe, kinuna na a daytoy iti maikapat nga ecological solid waste management summit iti Region One, ken kangrunaan a nabisita idi kalman ni DENR Undersecretary Benny Antiporda.
Segun kenni Hipe, iti nasao a summit ket addaan ranta a ma-update iti amin a lokal nga opisyal ken maseknan, maipapan kadagiti linteg nga adda pakainaigan na iti ecological solid management act (Republic Act 9003).
Malaksid dayta, tarigagay da a maibinglay kadagiti participants dagiti kabarwanan a teknolohiya iti panagi-belleng ti basura ken best practices dagiti LGUs iti proper solid management para iti mas naur-urnos nga implementasyon dagiti allagaden iti solid waste management system.
