LA UNION – Naminsan manen a nagpalagip ti Santo Tomas Phil. National Police kadagiti mangngalap a liklikan ti aglabsing kadagiti ordinansa ti ili ken dadduma pay a paglintegan nga adda pakainaigan na iti illegal fishing, tapno saan a matiliw ken mamulta.
Iti pannakiuman ti Bombo Radyo La Union kenni Pol. Major Ricardo Serrano, agdama a hepe ti pulisya idiay Santo Tomas, kinuna na nga ammo metten dagiti mangngalap dagiti ordinansa a maipatpatungpal, ngem adda latta dagiti fish workers nga agaramid ti maikaniwas.
Innayon pay ni Major Serrano a saan nga agkur-kurang dagiti otoridad, iti maritime police, ken bantay dagat task force, a mangipal-palagip kadagiti mangngalap kadagiti maiparbeng ken saan a maiparbeng nga aramid iti kabaybayan, tunggal mangisayangkat dagitoy ti barangay visitation malaksid pay iti inyuswat da a Project:DAING wenno Dagat ay Ingatan Nang Gumanda ang Kalikasan.
Mainaig ti daytoy, dua a mangngalap iti tiniliw dagiti otoridad idi bigat ti Domingo, iti kabaybayan a sakop ti Brgy. Casantaan, Sto. Tomas, La Union.
Segun kenni Major Serrano, natiliw dagiti mangngalap nga isuda Rodelio De Guzman, 49-anyos, ken Samson De Guzman, agpada a residente ti Brgy. Namonitan, Sto. Tomas, La Union gaputi panaglabsing da iti Municipal Fishery Ordinance No.2 Series of 2003 Chapter XV Section 72 wenno Fishing Operator Employing Unlicensed Fisherfolk or Fish Worker.
Nagresulta pay ti operasyon iti panangkumpiskar dagiti otoridad iti FB “Rhonel” motorized banca, 15 meters a fish net ken iti 2 kilo ti lames a nakalapan dagitoy a mapatta-patta nga agbalor ti Php 300.00.
Dagiti nasao a mangngalap agraman dagiti nakumpiskar nga ebidensiya ket naiturn-over iti Maritime Police Station para iti naan-anay a disposisyon.
