LA UNION – Napateg nga isaganaan iti panagtalon para iti napinpintas nga apit.
Iti pannakiuman ti Bombo Radyo La Union kenni Norma Lagmay, retirado a Provincial Agriculturist idiay probinsiya ti Ilocos Norte, kinuna na a napateg nga isagana ti talon, dagiti napintas a bukel wenno bin-i nga imula, ken dagiti arwaten iti panagtalon, tapno nabiit a maipatungpal iti panagmula ken gundawayan iti narway a danum ita a nadanonen ti panagtutudo.
Napateg met a madalusan dagiti irrigation canal, tapno nasayud ti panagayos ti danum agturong iti kataltalunan.
Impaganetget ni Lagmay a napateg iti panangdetermina nu anya a klase dagiti nateng iti rumbeng a maimula nu tiempo ti panagtutudo ken iti talon a pagmulaan, tapno saan a masayang iti bannog ken pinag-puonan.
Adda ngamin iti nat-nateng a nalaka a malungtot ken adda met iti klase ti nateng a natibker uray nu agsob-sobra ti danum.
Kinuna pay ni Lagmay a napateg itan ti panagmula iti arubayan wenno iti maaw-awagan a backyard gardening tapno maalay-ayan iti inaldaw a pagkasapolan ken iti ngumatngato a presyo dagiti gagatangen.
