(Update 1) LA UNION – Naiturongen iti salwad ti Department of Social Welfare and Development dagiti lima a babbai ken ti maysa a menor de edad a lalaki a biktima ti human trafficking kalpasan nga insalakan daytoy ti pulisya idiay syudad ti San Fernando, La Union.
Naammuan ti Bombo Radyo manipud ti San Fernando City Police Office, kasapulan a maipasidong pay iti counseling dagiti biktima sakbay a mapaawid dagitoy iti pagtaenganda.
Kabayatanna, impanamnama met ni San Fernando City Permits and Licensing Office Head Ofelia Mendoza a saan a makapag-operate ti videoke bar idiay syudad ti makinkukua ken suspek a ni Sherylyn Lim gapu ta nadagsen ti sangsanguenna a kaso.
Sigun kenni Mendoza, awanan ti work permits dagiti biktima a pagtratrabahuaen ti suspek iti nadakamat a balay-pagraragsakan.
Immuna iti daytoy, insalakan dagiti pulis dagiti nadakamat a babbai ken ti maysa a menor de edad kalpasan a nagreklamo dagitoy gapu ta mapilpilitda a maibugaw ken makinaig kadagiti kostumer ti bar kasukat iti kantidad a P1,000.
Sakbay a makadanon ditoy La Union, dagiti biktima a naggapu idiay Pagadian City ket immunan nga inkaryan ti recruiter a mangged iti pagtagilakuan ken makaawat dagitoy iti dakkel a tangdan.
