LA UNION – Agtultuloy pay laeng iti panangisagot iti sabong ken panangitugkel iti kandila dagiti Overseases Filipino Workers (OFWs) iti napamasak a car crash idiay sango ti Lucky Plaza Mall idiay Singapore.
Iti pannakiuman ti Bombo Radyo kenni Joy May Ortiza, tubo iti ili ti Bacnotan, La Union nga agtratrabaho iti nasao a pagilyan, kinunana a malaksid kadagiti sabong ken kandila ket nangisagot met dagiti kakailyan sadiay iti kararag kagidda iti panangsarabo ti baro a tawen.
Kabayatanna, iti laksid ti kinaliday iti isasangbay ti Baro a Tawen ket ikagumaan a maka-recover manipud iti pannakaulila ti pamilya Nocus gapu iti pannakatay ni Arlyn ken iti pannakadanran ni Arcely a maag-agasan idiay ospital ti Singapore.
Sigun kenni Mang Reynaldo Nocus, mamati daytoy a saan ida a baybay-an ti Dios kangrunaan iti tengnga ti paglablabasan dagitoy a karit iti biag.
Iti dua a kakabsat daytoy, kinuna ni Mang Reynaldo ket agpapaay kas breadwinner iti pamilyada.
Iti uneg ti 30 tawen a mangmangged idiay Singapore ti agkabsat nga Arlyn ken Arcely ket maymaysa laeng a pamilya ti nagserbian dagitoy nga amo, ken agpada a saanen a kaasawa dagitoy.
Iti agdama, ur-urayen iti sibubukel a pamilya iti panagsangpet ti bangkay ni Arlyn iti pagtaenganda idiay ili ti Caba, La Union.
