LA UNION – Nangisayangkat ti urgent meeting iti konseho barangay ti Carlatan, San Fernando City, La Union idi kalman tapno talantanen iti sangsangwen da ita a parikot seknan iti pannakaibangon ti cell tower wenno cell site ti DITO Telecommunity, iti Purok 2 ti nadakamat a barangay.
Malaksid kadagiti barangay officials nga idaulwan ni Barangay Chairperson Gemma de Guzman, naawis met iti nasao nga urgent meeting iti akinkukua ti lote a pakaipatakderan ti cell site, TELCO representatives, ken dagiti maseknan a residente.
Iti ekslusibo a pannakiuman ti Bombo Radyo kenni Barangay Kagawad Gladys Rimorin kadwa na ni Brgy. Kag. Eduardo Pimentel, impaganetget da a saan a da a kinanunongan nga opisyal ti barangay, iti nasao a proyekto.
Aminado dagitoy nga awan ti maaramidan da iti agdama, agsipudta maipagarop nga immunan nga inaprubaran daytoy ti lokal a gobyerno ti San Fernando.
Kinuna ni Rimorin, saan da koma met a supyaten iti nasao a plano, nu adda iti naiganwat a public consultation tapno mailawlawag kadakuada nga opisyal ken kadagiti maseknan a residente, iti pagsayaatan ken pagdaksan iti panangibangon ti cell tower iti maysa a lugar.
Ngem para kenni Rimorin, saan a maiparbeng nga iti masakopan na a purok iti pakaipatakderan ti cell site agsipudta adu dagiti babbalay a posible a paka-apektaran dagiti lumugar.
Maysa a pagdanagan iti tattao kadagiti maipatpatakder a cell tower ken cell sites ket manggubway daytoy ti risko iti salun-at, a patauden iti dakes nga epekto ti maaw-awagan nga Electromagnetic Radiation, kangrunaan na kadagiti ubbing ken addaan ti sagsagabaen a sakit.
Base iti report, adda iti pakabuklan a 15 a cell site iti maipatpatakder ditoy syudad ti San Fernando babaen kadagiti telecommunications company.
